CTU-Asturias wala pay kasiguruan kanus-a magamit

CEBU, Philippines — Pabiling wa magamit hangtud karon ang natukod nga building sa Cebu Technological University (CTU)-Asturias sa Barangay Langub tungod sa kabalaka sa kaluwasan niini.

Ang tulo ka andana nga academic building gitukod niadtong 2023 ug nahuman niadtong Nobiyembre 2025 ug adunay kini unom ka classroom apan wala pa kini ma-occupy tungod sa safety concerns sa lugar.

Matud ni Asturias Mayor Dana Andrew Dumdum, dili nila ipagamit sa mga estudyante ang building hangtod nga mapamatud-an nga luwas ang lugar.

Iyang giingon nga sa miaging linog, adunay mga bato nga nangahulog gikan sa pangpang, hinungdan nga nangayo ang lokal nga kagamhanan og assessment gikan sa Mines and Geosciences Bureau (MGB).

“Naghuwat mi sa DENR Bureau of Mines nga mohatag silag verification nga safety ang area. Kay sayang kaayo ang gihatag sa province nga dili jud magamit,” matod niya.

Samtang, naapektuhan sa sitwasyon ang CTU-Asturias nga adunay usa lamang ka programa, ang Agri-Business. Matud sa CTU representative nga si Ann Angel Matin-ao, hapit 300 ka estudyante ang nanginahanglan og classroom.

Sa pagkakaron, evacuation center nga gihatag sa lokal nga pangagamhanan ang ilang gigamit, apan dili kini igo aron ma-accommodate ang tanang estudyante.

Gipadayag usab ni Matin-ao ang panginahanglan sa ilang campus nga makagamit na sa bag-ong building aron masulbad ang problema sa classrooms.

Base sa assessment sa CTU Office of the University Planning and Development niadtong Hulyo 24, 2025, ang building nahimutang tupad sa usa ka titip nga limestone o rock cliff ug nalambigit sa mga risgo sama sa slope instability, rockfall ug drainage problems.

Giingon sa assessment nga adunay mga timailhan sa weathering ug fracturing sa cliff, samtang walay makita nga rockfall barrier, slope netting o retaining structure. Ang cliff gibanabana nga 30 hangtod 40 metros ang kataas.

Ang building usab gibana-bana nga lima hangtod 10 metros lamang gikan sa tiilan sa slope ug anaa sa posibleng runout zone sa mga bato, debris o landslide.

Girekomendar sa CTU ang detalyadong geotechnical engineering survey aron masuta ang stability sa slope ug integridad sa rock mass. Lakip sa mga gisugyot ang rockfall barriers, retaining walls, drainage system ug uban pang slope protection measures.

Niadtong Septiyembre 10, 2025, misulat si Dumdum sa MGB aron mangayo og assessment sa maong lugar human gipadayag sa engineering department sa CTU Main Campus ang kabalaka sa safety sa building.

Matud ni Dumdum, ang yuta diin gitukod ang building gipanag-iya kaniadto ni kanhi mayor Alan Adlawan nga midonate niini sa LGU aron matukoran og school building.

Samtang, giingon sa contractor nga si Henry Michavez nga nakig-coordinate sila sa Cebu Provincial Government, LGU ug CTU sa pagtukod sa building.

Apan sa pangutana kung iyang magarantiya nga luwas na kini gamiton, mitubag siya, “Dili ko ka guarantee jud.”

Niadtong Agosto 18, 2026, gipahigayon ang site inspection nga giapilan sa agriculture consultant ni Gobernador Pamela Baricuatro nga si Grecilda Sanchez, Dumdum, mga representante sa Cebu Provincial Engineering Office, contractor nga FGH Construction ug CTU.

Gihisgutan niini ang posibleng solusyon aron masulbad ang safety concerns ug mapadayon ang turnover sa building ngadto sa CTU-Asturias.  MEL BANAT NEWS