Hospital arrest kay Bonoan, aprub sa Sandiganbayan

MANILA, Philippines — Inaprubahan ng Sandiganbayan ang mosyon ni dating DPWH Secretary Manuel Bonoan na sumailalim siya sa hospital arrest habang naka-pending ang kanyang kasong graft at plunder na may kinalaman sa maanomalyang flood control project sa gobyerno.

Nilinaw ng graft court na ang desisyon ay bilang humanitarian consideration dahil sa kanyang edad at medical conditions.

Gayunman, sinabi ng Sandiganbayan Fifth Division na dapat sa PNP General Hospital sa ­Kampo Krame ito maisailalim sa hospital arrest at hindi sa The Medical City Hospital na nais nito.

Una rito, nagulat umano ang isang mahistrado sa Sandiganbayan dahil sa dami ng sakit nito na kinabibilangan ng chronic kidney disease (CKD) at prostate cancer.

Binasa ni Presiding Justice Geraldine Econg, ng Sandiganbayan Se­cond Division ang listahan ng mga sakit ni Bonoan batay sa impormasyong ibinigay ng pulisya sa hukuman.

Kabilang dito ang diabetes, hypertension, acute coronary syndrome, chronic kidney disease, prostate cancer, at pananakit ng gulugod o spine.

Ayon sa mahistrado, hihingi ang hukuman ng medical update mula sa PNP hinggil sa kalagayan ni Bonoan, na kasaluku­yang naka-confine sa The Medical City.

Kaugnay nito, kinumpirma ni DILG Secretary Jonvic Remulla na si Bonoan ay may dalawang surgeries ngayong linggong ito para magamot ang atake sa puso. Aniya, temporary measure lamang ang naging desisyon ng Sandiganbayan para kay Bonoan.

Agad ipadadala sa Sandiganbayan ang pormal na medical diagnosis ni Bonoan oras na makuha ang buong report para dito sa Lunes.

Si Bonoan ay kapwa akusado ni Sen. Jinggoy Estrada sa P573 million plunder and graft cases kaugnay sa flood control mess.