Bahad ni Trump

Usa na ka semana sa  paglingkod ni Donald Trump isip bag-o ug ika-45 nga presidente sa Estados Unidos. Tuod man, sa nakalabay nga mga adlaw, daghan na siya'g lakang nga nakapauyog sa internasyonal nga komunidad.

Pipila sa  iyang mga order mao ang paggawas sa Estados Unidos gikan sa Trans-Pacific Partnership, pag-restrict sa pagdawat sa mga Muslim gikan sa Middle East, lakip na sa Syria, ug ang pagtukod og dakong pader sa border uban sa Mexico.

Mura’g gitinuod gayud ni Trump ang iyang bahad nga iyang i-prioritize ang mga Amerikano ilalum sa iyang administrasyon. Sa iyang kampanya alang sa piniliay, daan niyang gisaad nga himuon niyang gamhanan pagbalik ang Amerika.

Ilalum sa iyang "America first policy," gusto ni Trump nga unahon ang mga Amerikano nga makakuha og trabaho. Kini usab ang hinungdan nga gusto siyang mo-pullout ang mga American companies gikan sa ubang nasud ug mopuhonan didto sa Estados Unidos.

Kining mao nga lakang nakapabalaka karon sa ubang kanasuran. Ug dili kini maayong tilimad-on alang sa internasyonal nga komunidad. Gani daghan ang mitagna nga moresulta kini ngadto sa populism ug protectionism nga pamalakad.

Gani, dinhi sa Pilipinas, daghan ang nabalaka nga basin unya kun mo-pullout  ang mga mamumuhonang Amerikano gikan sa nasud nunot niining lakang ni Trump.

Daghan sa mga American investment ang anaa sa business process outsourcing nga grabeng misulbong karon sa nasud.

Sa lain nga bahin, liboan ka mga Pilipino ang illegal nga nanimuyo didto sa Estados Unidos. Ug niining agresibong lakang ni Trump pagpalayas sa mga undocumented immigrants didto, dako karon ang kabalaka nga aduna unyay massive deportation sa mga Filipino sa umaabot nga mga adlaw.

Kana kun tinud-on gayud niya ang iyang bahad. Atong mahinumduman nga midaug si Trump sa eleksiyon gumikan sa iyang maisugong palisiya sa imigrasyon. Ug nga basin tulisokon siya sa iyang mga kaalyado kun dili niya kini tumanon.