EDITORYAL - Sinulog 2025 sa CCSC
![EDITORYAL - Sinulog 2025 sa CCSC](https://media.philstar.com/photos/2024/08/21/1_2024-08-21_23-46-08.jpg)
Karong adlaw nga Domingo, Agosto 25,2024 himoon ang Pasigarbo sa Sugbo sa Cebu City Sports Center nga salmotan og 50 ka mga contingents gikan sa nagkadaiyang kalungsoran sa lalawigan.
Samtang giorganisar kini sa Probinsiya sa Sugbo pinangunahan ni Cebu Gov. Gwendolyn Garcia, dinhi kini ipahigayon sa Cebu City inay nga sa mga component cities o ba kaha sa usa sa mga kalungsoran sa probinsya.
Ang gisuspensong mayor nga si Michael Rama nipadayag og disgusto nga anhi kini himuon sa siyudad kay lagi kalihokan man kini sa Kapitolyo ug angayan unta nga adto kini didto sa ilang hurisdiksyon buhaton.
Apan tungod kay aslom man ang relasyon niya ug sa gobernador, pun-an pa nga pag-umangkon sa gobernadora ang kasamtangang acting mayor sa Cebu City nga si Raymond Alvin Garcia, madudahan ang iyang motibo.
Sa pikas bahin, ang acting mayor daan ng may pagduhaduha sa pagpahigayon sa Sinulog Festival sa South Road Properties sud sa nakalabay nga duha ka tuig subay sa mando ni Rama.
Samtang ang gobernadora, dayag sab gyud nga wala siya kauyon nga sa SRP gihimo ang Sinulog, rason nganong duha ka tuig nga walay contingents sa probinsya nga niapil.
Kining pagpahigayon sa Pasigarbo sa Sugbo dinhi sa kadalanan sa Cebu City ug tapuson ngadto sa CCSC mura kini og ‘litmus paper’ kun pwede pa ba gihapong ibalik sa Sinulog sa sentro sa siyudad.
Ang CCSC mao man gyud ang tradisyonal nga venue sa Sinulog sud sa daghang katuigan, giusab lang kini ni Rama sa nakalabay’g duha ka tuig.
Daghan ang wala makauyon, bisan gani mga residente sa siyudad wala ganahi tungod sa kalayo ug dili accessible sa tanan ang SRP sa gustong makatan-aw.
Karon kining Pasigarbo sa Sugbo makapahinumdom kini og balik sa mga residente sa Cebu City sa kasadya sama sa kaniadto sa Sinulog.
Gipaabot nga modagsa gyud ang mga tawo gikan sa probinsya sugod palang sa adlaw nga Sabado hangtud sa Domingo ug magdala kini og aktibidades sa ekonomiya sa siyudad. Kun makita nga hapsay ug maayo kining Pasigarbo karong Domingo, walay rason aron ang Sinulog 2025 dili ibalik sa naandang venue.
- Latest