Comelec: Cortes maproklamar kong modaog sa May 2025 election

CEBU, Philippines — Mahimong maproklamar si dismissed Mandaue City Mayor Jonas Cortes kon modaog kini sa May 2025 election apan ang pagtugot niini nga makaasumir sa katungdanan lahi na usab nga hisgotanan.

Kini maoy gibutyag ni Atty. Francisco Pobe, direktor sa Commission on Election-7 dihang nahinabi sa mga tigbalita.

Si Cortes nagpapili pag-usab isip mayor sa Dakbayan sa Mandaue sa umaabot nga piniliay.

Sayo pa, ang poll body official ni-disqualify kang Cortes sa pagdagan sa May 2025 local ug national election human ang Comelec en banc nipagawas og certificate of finality and an entry of judgement niadtong Enero 3, 2025.

Ang diskwalipikasyon sa dismissed mayor gumikan kini sa petisyon nga gisang-at sa abogado nga si Ervin Estandarte niadtong Oktubre 25, 2024 tungod sa giingong material representation sa certificate of candidacy niini dihang gibutangan ni Cortes og “Not Applicable (N/A)” ang pangutana kalabot sa pending cases ug giingong pakyas kini sa pagtug-an sa iyang dismissal sa serbisyo subay sa desisyon sa Ombudsman niadtong Oktubre 3, 2024.

Apan si Cortes nakakuha og Temporary Restraining Order(TRO) gikan sa Supreme Court nga nagpugong sa Comelec sa pagkanselar sa COC ug pagtangtang sa ngalan niini sa listahan sa mga kandidato sa Dakbayan sa Mandaue.

Magpabilin si Cortes nga "perpetually disqualified to hold any public office" base sa desisyon sa Ombudsman human kini gi-dimissed sa posisyon.

Kini tungod kay nakita sa Ombudsman nga guilty si Cortes sa grave misconduct sa pagtugot niini nga magpadayon ang operasyon sa Suprea Philippines Development Corp., usa ka batching plant sa Barangay Labogon bisan pa og walay business permit, sanitary permit, ug environmental clearance.

Ang kampo ni Cortes niapelar sa Court of Appeals apan gi-deny ang ilang apelasyon alang sa pagluwat og TRO ug writ of preliminary injunction.

Apan ang pag-deny sa CA pag-apela ni Cortes dili makaapekto sa eligibility niini nga modagan sa May 2025 elections.

Si City Administrator Jamaal James Calipayan niklaro niadtong Biyernes, Marso 7, 2025 nga ang request alang sa TRO kabahin sa petition for review ni Cortes sa CA. (BANAT NEWS)