ARQ Builders, Metro Cars 3-0 na sa MPBA Season 3

CEBU, Philippines — Ang defending champion ARQ Builders ug Metro Cars nagpabiling way pilde sa Mandaue’s Pride Basketball Association (MPBA) Commissioner’s Cup Season 3 niadtong weekend didto sa Cebu Port Authority (CPA) gym.

Sila si Spencer Ugsimar ug Ian Ortega nagkumbinar og 31 puntos sa dihang ang ARQ ni team owner Jason Arquisola nakalingkawas sa Purexfit Cebu, 87-85, aron pahugtan ang ilang pagkupot sa solong liderato sa Elite Division uban ang perpektong 3-0 rekord.

Sila si Jude Betonio ug Elmer Villabrille mihimo sab og kasikas sa ARQ bitbit ang 14 ug 12 puntos.

Si Keanu Ray Limana mipabuto og 21 puntos samtang sila si Jan Javellanas ug Travis Crisologo nagkumboya'g 23 puntos apan nakawang ang ilang paningkamot kay ang Purexfit nahagba sa ikaduhang sunod-sunod nga higayon.

Sa laing sangka sa Elite, si Matthew Paras mipabuto og 28 puntos uban ang walo ka rebounds, tulo ka assists ug duha ka steals sa dihang ang Steadfast mipayaka sa Artera Builders, 97-83, alang sa una nilang daog. Si Miguel Gastador mi-iskor og 16 samtang si Rendell Senining midugang og 14 puntos aron tabangan ang Steadfast nga pakgangon ang duha ka sunod-sunod nilang pilde.

Si Justine Dacalos mitali og 15 puntos samtang si Paul Sungahid mihipos og 13 puntos alang sa Artera, nga naparot sa unang higayon sud sa duha ka duwa.

Sa Premiere Division, si Hersley Fuentes mipabuhagay og 24 puntos, pito ka assists, tulo ka rebounds ug duha ka steals sa dihang ang Metro Cars milampornas sa Home Sourced, 94-81, aron inaton ang mainit nilang ratsada ngadto sa tulo ka duwa.

Si Jerick Gonzaga miamot og 18 puntos, samtang sila si James Asoro ug Joemarie Beldoro mikadlit og 11 puntos matag usa alang sa Metro Cars.

Si James Villafuerte mipupo og 19 puntos, samtang sila si Bolyn Hiatoro ug Jade Digal parehong mikimada og 13 puntos alang sa Home Sourced, nga natagak sa 1-2.