Meralco misilyo og luna sa PBA playoffs
CEBU, Philippines — Ang Meralco Bolts mipayaka sa NorthPort Batang Pier, 114-104, aron pag-angkon og luna sa quarterfinals
PBA Governors' Cup niadtong Sabado sa gabii didto sa Ninoy Aquino Stadium sa kaulohan.
Si Allen Durham mitali og 23 puntos ug milangkat og 13 ka rebounds sud lamang sa tulo ka kuwarter samtang sila si Chris Banchero ug Chris Newsome mipakita sab og maayong labok aron tabangan ang Bolts pagpabarag sa Batang Pier.
Si Newsome mipupo og 20 puntos ug 11 ka rebounds samtang si Banchero midugang og 19 puntos.
Nagparamdam sab ang eksplosibo nilang rookie nga si CJ Cansino uban ang 12 puntos apil na ang duha ka 4-pointers sa unang kuwarter nga nakatabang sa Bolts pagkontrola sa duwa.
Gawas nga nakabangon gikan sa miagi nilang 99-108 nga kapildihan ngadto sa TNT Tropa Giga, ang Bolts segurado na sab og luna sa playoffs bitbit ang 6-2 win-loss record.
Si Meralco coach Luigi Trillo nagkanayon nga lagmit ilang gamiton ang nahibilin nilang mga duwa sa eliminasyon batok sa Converge ug Terrafirma isip kabahin sa ilang preparasyon alang sa sunod nga hugna sa torneyo.
"At this point we want to get playoff-ready. At the start of the season we didn't get any tuneup games. We got limited practice so parang now we need to win but we also need to get ready," padayag pa ni Trillo.
"For us, we probably want to use these next two games as building blocks moving into the playoffs. But it's hard to find that level of intensity dahil you're already in. So we have to manage that," dugang pa niya.
Sa laing bahin, ang NorthPort natagak sa 3-5 ug kinahanglan sila nga modaog batok sa Magnolia ug TNT aron pahayagan ang hanap nilang tsansa nga makatikang sa playoffs.
- Latest
