Way immunity ug di confidential

Dili ganahan si Bise Presidente Sara Duterte nga maminaw sa labing uwahing mga panghunahuna sa iyang kanhi alyado nga si kanhi Senate president Koko Pimentel:

•Una, nga wala siyay immunity from suit, mao nga mahimo siyang imbestigahon sa Ombudsman ug ubang mga ahensiya sa gobyerno (nga mao say sukaranan sa Department of Justice sa pagpasaka og kasong grave threats batok niya atubangan sa Quezon City Regional Trial Court); ug

•Ikaduha, nga dili na confidential ang mga dokumento sa gigastohan sa iyang confidential funds tungod sa nagpadayon nga Senate impeachment trial.

Si Rodrigo Duterte nidagan ug nidaog pagka presidente ubos sa partido ni Pimentel, ang PDP-Laban. Gisuportahan ni Duterte si Pimentel sa pagka Senate president sa pag-asumir nila sa puwesto sa 2016. Ni-resign hinuon si Pimentel dihang nitakli ang mayoriya ngadto ni Tito Sotto sa Mayo 2018.

Nabuak ang PDP-Laban dihang gipalagpot ni Duterte si Pimentel niadtong 2021. Ilang duha ka factions sa partido managlahi og gisuportahan sa pagka presidente sa 2022: Ang grupo ni Pimentel nisuporta ni Manny Pacquiao; samtang ang kampo ni Duterte nipaluyo ni Ferdinand Marcos Jr.

Nakontrolar ni Duterte sa PDP-Laban dihang, tungod sa protesta ni Pimentel, gidapigan ang iyang faction sa Commission on Elections ug sa Korte Suprema. Gitangtang ni Duterte ang Laban gikan sa PDP atol sa tigom sa Sugbo sa 2024.

Mao kadto ang kinadak-ang tamparos. Kay dinhi sa Sugbo ang PDP gitukod sa amahan ni Koko nga si Nene Pimentel uban nilang anhing Tony Cuenco isip nasudnong chairman ug anhing Dodong Holganza isip secretary-general.

Tam-is bang panimawos ang gihukad ni Pimentel batok sa anak sa politiko nga ila ra untang bisita pero maoy niilog ug niguba sa partido? O igo lang nipadayag sa iyang gituohan nga maoy tinuod nga kahulogan sa 1987 Constitution?

Ang daotang balita para ni VP Sara mao nga dili ordinaryong komentarista si Pimentel. Isip topnotcher sa 1990 Bar examination ug isip kanhi Senate president, tinahud ang iyang kinaadman sa balaod nagpabilin ang iyang kasuod sa senator-judges nga human maminaw sa tanang testimoniya ug motimbang-timbang sa mga ebidensiya maoy mohukom magpabilin pa ba siya sa puwesto ug makadagan pa ba sa 2028.