Worst case ccenario sa Super El Niño

Kini ang gitan-aw sa Cebu provinvcial government nga mamahimong sangpotanan sa very strong El Niño busa gilatag na nila ang tanan aron maseguro nga walay mabiyaan nga mga Sugboanon kong mahitabo man gyud ugaling kini. Usa sa ilang giplastada ang mga kakuhaan og supply sa tubig nga maapod-apod sa mga molupyo sa lalaiwigan ilabi na kadtong mga lungsod nga walay kaugalingong water supply. Gidasig usab sa LGU ang mga tawo nga mohimo og kinaugalingong pagpangandam sa pagkaon, tubig ug ubang mga essentials sulod sa 72 oras.

Bisan pa man sa maayong paglantaw ug maayong katuyoan sa Kapitolyo, adunay mga bug-at nga hagit nga kinahanglang hatagan og pagtagad aron dili magpadayon ang kabalaka sa katilingban. Unang hagit mao ang kahimtang sa mga kabus nga Sugboanon.

Bisan og matarong ug sakto ang awhag nga ang matag pamilya magpundo og tubig ug pagkaon alang sa tulo ka adlaw, kinahanglang ilhon sa kagamhanan nga dako ang panon sa katawhan nga nagpuyo sa kakha tuka o isang kahig isang tuka—mga tawo nga walay igong salapi ug kapasidad aron makatigum og pundo sa ilang mga balay. Kon walay luyong ayuda ug direktang suporta nga ihatag sa kagamhanan alang kanila, ang maong awhag magpabilin lamang nga usa ka damgo ug magdugang lamang sa kalisang sa mga timawa.

Gawas pa niana, ang pagpatuman sa mga lakang kinahanglang molihok nga walay kahinay ug walay bisan unsang paglangan. Ang plano sa pag-apud-apod sa tubig pinaagi sa mga sakyanan ug ang pagpangita og mga bag-ong tuboran kinahanglang dili magpabilin sa mga diskurso, mga kasabutan, ug mga dokumento sa Kapitolyo.

Kinahanglan kini nga makadangat dayon sa mga labing lagyo nga bukirang barangay diin ang mga tabay ug sapa nagsugod na sa paghubas. Ang paglangan sa pag-abot sa maong tabang magpasabot og dakong kadaot sa panglawas ug panginabuhian sa katawhan.

Sa edukasyon ug sa kaugmaon sa kabataan, ang pagpaundang sa klase tungod sa kainit sa adlaw usa ka kinahanglang lakang aron mapanalipdan ang panglawas sa mga tinon-an. Apan kinahanglang tan-awon nga ang matag adlaw nga mabaldada ang pagkat-on sa mga bata. Tungod niini, dili igo nga basta lamang ipaundang ang klase; kinahanglang adunay lig-on, haom, ug klarong alternatibong pamaagi sa pagtuon gikan sa balay aron ang kahibalo sa mga bata dili maalkanse samtang giatubang sa mga LGU ang hulga sa katalagman.

Sa katibuk-an, maayo ang gihimong pagpangandam sa Lalawigan sa Sugbo batok sa El Niño. Apan aron maseguro nga kapuslanan kini sa tanan, kinahanglang masiguro nga ang matag ayuda ug serbisyo makadangat gayod sa labing kabus nga molpyo, ug ang pagpanalipod sa seguridad sa panglawas dili maghatag og kadaot sa uban pang haligi sa atong katilingban sama sa edukasyon, panarbaho, ug sa kinatibuk-ang panginabuhian sa katawhan.