Pakauwaw sa INC
Bisan sa tulo ka adlaw nga protesta sa Iglesia ni Cristo (INC), gidayon sa Ombudsman ang pagpasaka sa kasong plunder batok ni Senador Rodante Marcoleta gahapon. Kon moluwat dayon ang Sandiganbayan og arrest warrant, mapriso si Marcoleta ug dili katambong sa pagsugod sa impeachment trial ni Bise Presidente Sara Duterte unya sa Lunes, Hulyo 6.
Gitinuod ni Ombudsman Boying Remulla ang iyang pasalig. Nga hinog nang kaso. Nga mas daling naandam kay ang mga ebidensiya gikan mismo ni Marcoleta. Ug nga dili sila mahudlat sa pagpakita sa braso sa INC.
* * *
Gilibkas sa INC ang ilang protesta niadtong Huwebes sa gabii uban ang pangangkon nga malampuson nga napadangat ang ilang mensahe ngadto sa gobyerno: Nga dili makiangayon nga mas unang gikasohan si Marcoleta kay sa dagkong kawatan sa flood control projects nga iyang gi-imbestigar.
Nasobrahan ang bilib sa INC sa ilang impluwensiya. Tungod sa kadaghan sa mga politiko nga giangkon nga ilang napadaog sa mga eleksiyon. Pero dili sila makabuot kinsay mapahamtangan sa balaod. Labaw nang dili kadupa sa paborito nilang senador nga nangunay paglawog sa iyang kaugalingon sa tirong.
* * *
Gawas pa, dili tinuod ang ilang pangangkon nga si Marcoleta isog nga nangimbestigar sa flood control scandal. Sa tanang kahigayonan nga gihatag niya sa pagpangulo sa imbestigasyon, ang pagpangabogar ra sa mga Discaya ang ikapasigarbo.
Sa 28 ka adlaw nga pagkontrolar nila sa liderato sa Senado, wala siyang kalusad og bisan usa ka imbestigasyon. Dihang nangimbestigar human nahukasan sa komitiba, kutob ra sa pagdiktar sa nangangkong kanhi marines. Nga wala magkadimao ang mga testimoniya.
* * *
Mas dakong kauwawan sa INC ang kapakyas sa pagtapok sa naandan nga gidaghanon sa ilang mga sakop. Nipasalig nga labing 100,000 ang mobiya sa ilang mga trabaho ug motambong sa kalihokan. Pero 12,000 ray nipakita sa unang adlaw, 15 mil sa ikaduha ug 8,000 sa kataposang adlaw.
Bisan duha ka milyon ang nitambong sa nasudnon nilang protesta niadtong Enero 2025, gi-impeach si VP Sara pagka Pebrero sa makabungog nga mayoriya sa mga kongresista. Mas sayon nga gisalikway sa gobyerno ang mingaw nilang mga protesta karong semanaha. Gipakapinan pa og maximum tolerance, special treatment ug libreng mga pagkaon.
* * *
- Latest
