EDITORYAL — Kalibog sa CBRT

Wala pa gani maka fully operate ang Cebu City Cebu Bus Rapid Transit (CBRT) naa napuy laing isyu nga kinahanglang atimanon, kaning bahin sa pagsupak ni Vice Mayor Tomas Osmeña sa pagbutang og rota diha sa South Road Properties padung sa Ayala Business Park.

Ang rason ni Osmeña wala na daw ni gasunod sa orihinal nga plano nga maoy giaprubahan sa World Bank nga gikan sa Bulacao padung sa Talamban.

Sa pagsugod palang ana nga proyekto, wala na ni dayun nasugdan og himo kay nag-atubang og daghang isyu sa road right of way, sa pagbayad sa mga luna sa pribadong mga tawo nga naigo sa proyekto, ug daghan pa.

Naabtan og pila ka tuig ayha gyud kini aktwal nasugdan ang konstruksyon , ug karon nga naa nay inisyal nga nahuman (Phase 1), wala gihapon mamao ang paggamit, kay ang orihinal nga planong ekslusibong BRT bus ray mogamit, gipaagian na sad og tradisyonal ug modern PUJs.

Karon, kaning pagdugang sa rota sa SRP padung sa Ayala nasad ang naisyu. Pero ang pangutana ani, unsa man gyud diay maoy tumong aning CBRT dili ba alternatibo, hamugaway ug paspas nga transportasyon sa publiko?

Kanang rota sa SRP padung sa Ayala, dako na og matabang para sa publiko nga sumasakay. Kada adlaw, kaliboan ka mga trabahador ang gikinahanglang mo-report sa ilang mga trabaho diha anang mga dapita.

Nagkinahanglan sab na sila og paspas, hamugaway nga matang sa transportasyon para sa ilang inadlaw-adlaw nga trabaho.

Usa pa, kaning mga lugara naa sab nahimutang ang mga dagkong malls nga adtuon sab pirme sa mga tawo kay naa say daghang mga negosyo.

Kung hunahunaon og maayo, ang dili lang negosyo ang naa, kondili naa sad ang mga residential areas, mga nagkalain-laing establisamento, mga eskuylahan, ug daghan pa nga diin nagkinahanglan ang mga tawo og masakyan.

Maayo tingali nga padayunon ang orihinal nga rota ug ikonektar sa CBRT route ang SRP-Ayala para pud makabenepisyo ang mga naa aning mga lugara.

Ang epektibong transportasyon sa usa ka lugar makapadali ug makapapaspas sa paglambo sa maagian niini.