Korapsiyon nadawat na?

Nadawat na ba sa kabagang katawhan sa nasud nga Pilipinas ang korapsiyon? Nahimo na ba ang korapsiyon nga kabahin sa pagpakabuhi ug panginabuhi sa kabagan sa katawhang Pilipinhon o sa mga tawong naglingkod sa Malakanyang ug mga nagapalibot kaniya? Pangutana kining mugna sa atong mga nakita.

Sa kalapad ug katinaw sa pangawkaw sa bahandi sa nasud gamay lang ang nagtagawtaw, nagyawyaw ug nagpakabana. Timailhan ba kini nga nadawat na sa katawhan sa atong katilingban ang korapsiyon.

Adunay pipila ka grupo nga nagpakita sa ilang pagkondinar sa lapad nga pangawat sa bahandi sa nasud apan pila lang pod sila ka podyot. Samtang ang grupo nagprotesta ang kabagan kanato igo lang nangiyogpos ug naglantaw nila.

May nagreklamo tungod sa korapsiyon pero wala siyay gihimo aron mahunong kini. Samtang ang naghimo og sulbad ug nagbutyag sa mga gihimong korapsiyon sa mga naglingkod sa gobyerno mao pa hinuon ang gilutos sa mga korakot.

* * *

Pasakaan sa Ombudsman og kasong plunder si Senador Rudante Marcoleta tungod sa pagdawat niya tampo alang sa kampanya sa iyang kandidatura (campaign contribution) sa pagka Senador sa miaging bugnong lugaynon sa kantidad nga P75 milyones. Ang kasong plunder taas nga krimin diin ang akusado dili poyde nga makapiyansa. Ang Plunder kaso kini nga ang akusado nakakawat og P50 milyones gikan sa panudlanan sa gobiyerno o nakadawat og suborno gikan sa pribado nga tawo. Ang tampo nga salapi alang sa kampanya sa kandidato sa bugnong lugaynon  makonsiderar ba nga suborno? Kun suborno man kini, kinsa man sa mga kandidato ang wala modawat og suborno?

Kun ang pagdawat og campaign contribution suburno, unsa may itawag nato sa mga kandidato nga nangayo o mangayo (nagsolicit/magsolicit) og campaign contribution? Extortion? Kinsa man sa mga politiko o mga partido ang wala modawat ug wala mangayo og campaign contribution para sa bugnong lugaynon? Wala! Si Senador Marcoleta miangkon nga nakadawat siya maong gikasohan siya ang uban wala miangkon maong safe sila. Pagtulonan nga nakatonan. Ayaw g’yud og angkon bisan lubagon pa nang imong liog. Mao ni ang motto sa daghang politiko.