Sagbot sa Sugbo
Sa mga mata ni Cebu City Mayor Nestor Archival sagbot ang ubang mga sakyanan sa kadalanan. Maong nag-deploy siya og street sweepers. Aron paghawan sa mga agianan sa iyang convoy gikan ug ngadto sa iyang pinuy-anan sa Talamban ug daghan uyamot nga mga destinasyon sa Metro Cebu.
Pero aron dili kapasanginlan nga ang iyang street sweepers dili lang para sa personal nga interes nipasalig siya nga ang ilang kapuslanan mao ang pagpatultol sa mga sakyanan sa saktong lanes ug pagbadlong sa abusadong mga motorista aron hapsay ang biyahe sa tanan.
* * *
Usa sa mga rason nganong si Archival ang nagtungkawo karon sa City Hall mao ang talento pag-usab sa bisan unsang istorya aron mohaom niya. Sama sa iyang pagkumbinser ni kanhi Mayor, karon Bise Mayor, Tommy Osmeña nga siya ang labing takos nga mohaw-as sa syudad gikan sa mga pakauwaw sa nangaging mga pamunoan.
Bisan sa pasidaan sa ubang mga sakop sa ilang grupo, nga nasuhito sa mga gihimo sa mga higayon nga nagtuo siya nga walay nagtan-aw, nga wala siyay kalainan ug mahimo ganing mas grabe sa mga gipulihan.
* * *
Niang mga buslot sa istorya ni Archival:
• Kon iyang street sweepers (nga giila sa CCTO nga mga trabahante sa office of the mayor) maoy tighapsay sa trapiko, nganong iyang convoy ra may gikuyogan, nganong wala man patabanga sa ubang nabara nga kadalanan?Katuohan untang inimbento niyang ngalan kon wala pa mas unang nikumpisal ang iyang chief of staff nga si Kenneth Siasar nga gikinahanglan ni Archival ang motorcycle escorts aron dili mauwahi sa daghan niyang appointments.
* * *
• Bisan unsa pay palusot, nakalapas si Archival sa labing menos unom ka mga balaod (Republic Act 4136, ang Land Transportation and Traffic Code sa 1964; Presidential Decree No. 96 sa 1973; Republic Act 6713, ang Code of Conduct and Ethical Standards for Public Officials sa 1989; memorandum ni kanhi Presidente Joseph Estrada sa 1998; Joint Administrative Order No. 2014-01 sa DOTC, LTO ug LTFRB sa 2014; ug Administrative Order 18 sa 2024).Ug kapait sa mga motoristang nabiktima sa iyang convoy, gawas nga giilogan bisan nakauna sa dalan, mao pa gyoy gipakasala sa kahuot sa trapiko.
* * *
- Latest
