Dakong bakak sa INC
Dakong bakak ang pahibawo sa kadagkoan sa Iglesia ni Cristo (INC) nga nagprotesta sila sa Edsa aron pag-awhag og matinud-anon nga imbestigasyon sa P1.7 trilyones nga flood control scandal, nga gihulagway nga maoy labing dakong kinawatay sa atong kasaysayan.
Kon matinud-anon pa ang ilang kampanya batok sa pangurakot, wala unta nila paluyohi sa kada eleksiyon ang mga politiko nga nag-una sa listahan sa mga gipasanginlan nga niburot sa flood scam. Apil ang duha nga nabalhog na sa Quezon City Jail, silang Senador Jinggoy Estrada ug kanhi Senador Bong Revilla.
* * *
Ilang sakop nga gipahinungdan sa ilang protesta, si Senador Rodante Marcoleta, utrong gipasanginlan og plunder. Dili pinaagi sa inimbento nga mga ebidensiya–sama sa gigamit sa ilang idolo nga si kanhi Presidente Rodrigo Duterte batok ni Kongresista Leila de Lima–kon dili base sa kasayuran nga gikan ra sab ni Marcoleta.
Paspas nga naandam sa Ombudsman ang kaso batok ni Marcoleta–mas una kay sa ubang mga senador nga mas unang na-imbestigar–kay ang tanang sirkumstansiya ug mga elemento sa plunder giangkon ni Marcoleta sa iyang kaugalingong programa sa TV station sa INC.
* * *
Labing lig-on nga ebidensiya nga ang INC nihangop sa pangurakot mao ang hingpit nilang suporta sa UniTeam nilang Presidente Ferdinand Marcos Jr. ug Bise Presidente Sara Duterte niadtong 2022:
Si Marcos Jr. anak ni Ferdinand Marcos Sr. nga giila nga labing kawatan sa mga pangulo sa kanasuran sa kalibotan; samtang
Si Sara anak sa piniriso sa International Criminal Court sa kasong crimes against humanity ug ginganlang mastermind sa binilyon ka pesos nga kinawatay sa Pharmally ug ubang eskandalo.
* * *
Gawas sa nangalisbo nilang mga ginikanan, silang Marcos Jr. ug Sara wala sab magnihit sa kuwestiyonableng mga binuhatan:
Ang una nagpakaaron ingnon nga nibisto ug nangampanya batok sa flood scam pero wala apila sa pag-imbestigar ang iyang mga paryente, mga sakop sa gabinete ug mga alyado sa politika; samtang
Ang ikaduha hangtod karon nagdumili sa pagtubag sa lig-ong mga ebidensiya nga iyang gibolsa ang minilyon ka pesos nga confidential funds ug gitagoan ang binilyon ka pesos sa iyang bank accounts nga gidudahang gikan sa ilegal nga drugas, ilegal nga sugal ug ubang mga sindikato.
* * *
- Latest
