DILG sa Ombudsman: Bamban Mayor, suspindihin!

MANILA, Philippines — Pinasususpinde ni Interior and Local Government Secretary Benhur Abalos sa Office of the Ombudsman si Bamban, Tarlac Mayor Alice Guo kasabay ng binuong task force na mag-iimbestiga ng posibleng pagkakasangkot nito sa ilang illegal activities ng Philippine Offsore Gaming Operation (POGO) sa kanyang  bayan.

“The DILG recommended to the Ombudsman the issuance of a preventive suspension against Mayor Guo, to prevent any influence on the continuing investigations of our and other agencies,” ani Abalos.

Ayon kay Abalos, patuloy ang kanilang kooperasyon sa Ombudsman at iba pang investigating body upang halukayin ang ilang mga mahahalagang impormasyon hinggil sa alkalde.

Kabilang sa sinisiyasat ay ang pagtakbo ni Guo bilang alkalde ng Bamban. Marami aniya ang nagsasabi na hindi kilala si Guo at ikinagulat ng marami ang pagtakbo at pagkapanalo nito noong 2022.

Layon ng kanilang imbestigasyon na maprotektahan ang local institution at ang  publiko.

Una nang sinabi ni Pangulong Ferdinand “Bongbong” Marcos na iniimbestigahan na si Guo noon pa man.

Matatandaang sinalakay ng Criminal Investigation and Detection Group (CIDG) ang Hongsheng Gaming Technology Inc., na POGO hub noong Pebrero 2023 sa Bamban na parehong compound na ginamit ng Zun Yuan Technology Inc., na niraid din ngayong  buwan ng mga awtoridad.

Lumilitaw sa pagtatanonong ni Sen. Sherwin Gatchalian na isa sa mga sasakyang nasa compound ng Zun Yuan Technology ay nakapangalan sa alkalde.

Subalit itinanggi ni Guo ang anumang pagkakasangkot sa illegal activities ng Zun Yuan Technology Incorporated, kabilang ang human trafficking at illegal detention.