Palles nagpakita ng potensyal sa Dakar YOG

DAKAR — Bagama't hindi nakasampa sa final round ay impresibo ang ipinakita ni Pinoy gymnast Hilarion Palles III sa men’s all-around ng Dakar 2026 Youth Olympic Games.
“I had the best exposure I could ever get from these games and I got to meet some of the best gymnasts in the world my age, many of them even became my friends,” ani Palles matapos ang qualification rounds sa Dalar Exhibition Center sa Diamniadio.
Kasama rin ni Palles si Tchelzy Maayo na sumalang sa women’s qualification bilang bahagi ng Team Philippines na ipinadala ng Philippine Olympic Committee at suportado ng Philippine Sports Commission.
Sa isa sa dalawang medal events lamang maaaring lumahok sina Palles at Maayo dahil walang sapat na miyembro ang delegasyon para sumali sa team event.
Nagpakita ng potensyal ang 16-anyos na si Palles, isang multi-winner sa Palarong Pambansa, na maaaring sumunod sa mga yapak nina double Olympic at Asian Games gold medalist Carlos Yulo at Asian Games bronze medalist Eldrew Yulo.
Nagsimula si Palles sa gymnastics sa iconic Club Gymnastica na pinasikat ni gymnastics at taekwondo icon Bea Lucero Lhuillier.
Nakita siya ng Gymnastics Association of the Philippines at nasa ilalim ngayon nina Capellan at Japanese coach Munehiro Kugimiya.
Umiskor si Palles ng 12.266 points sa vault, 9.666 points sa parallel bars, 11.566 sa horizontal bar, 11.733 sa floor exercise, 10.266 sa pommel horse at 10.166 sa rings.
Tumapos si Palles sa 49th place sa hanay ng 60 athletes na may 65.633 points.
Sumabak rin si Naomi Cesar sa women’s 800 meters ng athletics at Maritanya Krog sa women’s road race ng cycling.
- Latest



















