Veteran journalist Philip Lustre, inaresto sa Davao cyber libel

MANILA, Philippines — Inaresto ng mga operatiba ng pulisya ang 72-anyos na beteranong mamamahayag na si Philip Lustre Jr. habang dumadalo sa isang forum sa isang restaurant sa Quezon City nitong Sabado ng umaga kaugnay ng kasong cyberlibel.

Dinakip si Lustre bandang 11:10 ng umaga ng mga tauhan ng Quezon City Police District (QCPD) Station 10 sa Dapo Restaurant sa Quezon City, kung saan regular na isinasagawa ang isang news forum tuwing Sabado.

Ayon kay QCPD Acting Director P/Brig. Gen. Christopher Olazo, isinagawa ang pag-aresto sa bisa ng warrant of arrest na inilabas ng Davao City Regional Trial Court (RTC) Branch 10 kaugnay ng mga kasong libel at cyberlibel na isinampa laban kay Lustre ni Davao City 1st District Rep. Paolo Duterte.

Itinakda ng korte ang piyansa para sa kanyang pansamantalang paglaya sa halagang P48,000.

Ayon kay Lustre, wala siyang kinalaman sa mga reklamong libel at cyberlibel na inihain laban sa kanya at nagulat na lamang umano nang dumating ang mga operatiba upang dakpin siya.

“Ilalaban ko ito. Hindi ko ito uurungan,” ani Lustre habang isinasakay sa police mobile.

Samantala, si Atty. Dino de Leon, isa sa mga panauhin sa news forum, ang tatayong abogado ni Lustre.

Si Lustre ang may-akda ng aklat na “Kill, Kill, Kill,” na tumatalakay sa mga extrajudicial killing (EJK) sa bansa at sa mga usapin ng umano’y crimes against humanity kaugnay ng madugong kampanya kontra droga noong administrasyon ni dating Pangulong Duterte.

Kasalukuyang nasa kustodiya ng QCPD si Lustre at sumailalim na sa booking procedures matapos maaresto.