‘Resort’ sa Davao nadiskubre ng NBI
MANILA, Philippines — Sisiyasatin ng House prosecution panel ang mga bagong natuklasan ng National Bureau of Investigation (NBI) tungkol sa mga ari-ariang iniuugnay kay Vice President Sara Duterte, kabilang ang isang umano’y resort-like property sa Davao na lumutang sa impeachment trial.
Sa ika-38 araw ng paglilitis, ipinakita ni Senator-Judge Erwin Tulfo ang video ng NBI na nagpapakita ng dalawang ari-arian na nakatala umanong agricultural land ngunit may mga pasilidad na kahawig ng resort.
Hiniling ni Tulfo sa prosecution na beripikahin kung ang mga naturang ari-arian ay naideklara sa SALN ni Duterte at kung naisama sa pagsusuri kaugnay ng umano’y P817.87 milyong unexplained wealth.
Nagbigay naman ng katiyakan si House prosecutor Chel Diokno na susuriin nila ang naturang impormasyon.
Ayon sa forensic accounting expert na si Alexander Cabrera, hindi pa niya matiyak kung kabilang sa kanyang ulat ang mga ari-ariang ipinakita ng NBI dahil kailangan pa niyang makita ang mga titulo, address at lawak ng mga ito.
Napansin din ni Cabrera na tila mataas ang halaga ng isa sa mga ari-arian dahil umano sa mga swimming pool na naroon, ngunit nilinaw niyang kailangan pa rin ng masusing beripikasyon ng mga dokumento.
Nauna nang iniulat ni Cabrera ang P817.87 milyong umano’y hindi maipaliwanag na yaman na iniuugnay kina Duterte at Carpio mula 2022 hanggang 2025. Nakabatay ang kaniyang pagsusuri sa mga available na rekord sa bangko, buwis, insurance, ari-arian at mga korporasyon.
Sa ngayon, wala pang pinal na konklusyon kung naisama na ang mga ari-ariang natukoy ng NBI sa naunang kalkulasyon ng umano’y hindi maipaliwanag na yaman na iniuugnay kina Duterte at sa asawa nitong si Atty. Manases “Mans” Carpio.
- Latest
