EDITORYAL — Gianad sa sayup nga pamatasan

Ning nakalabay nga mga adlaw, saba kaayo sa social media ang kabahin sa pipila ka mga kawani sa gobiyerno nga direktang niatake sa tigpamaba sa Palasyo nga si Atty. Claire Castro, partikular ana bahin sa iyang gibuhiang pamahayag mahitungod sa pipila ka magtutudlo nga matud pa mabasol nganong naay mga batang walay mga maayong pamatasan.

Nahisgutan napud nato dinhi nga ang disiplina sa atong kabataan anha tanan magsugod sa panimalay, gikan sa ilang mga ginikanan ug ilang mga katiguwangan sa pamilya.

Si Castro naputos og pagsaway gikan sa mga magtutudlo ilabi na sa Association of Concerned Teachers (ACT) tungod sa iyang pamahayag bahin sa pagka-badlungon sa ubang mga magtutudlo maong nahimo silang dili maayong ehemplo sa mga kabataan.

Apan angkunon man o dili sa publiko, tinuod ang gipanulti ni Castro nga dunay mga magtutudlo nga nalimot sa ilang propesyon ug kung unsa ilang papel atubangan sa mga kabataan.

Sila maoy angay mopasabot sa mga bata sa mga panghitabo sa ilang palibot, sa dagan sa panggobiyerno, ug mohatag og giya sa mga bata para makasabot niini.

Dili kay magapil-apil sila sa isyu nga mura na hinuon sila og apil sa problema gikalibgan sa ilang mga tinun-an. Nawala na ang ilang moral standards tungod sa ilang personal nga pagtuo ug gikalimtan ang mas dako nilang papel sa mga batang henerasyon.

Mabasol ning tanang nga dili maayong binuhatan sa pipila ka lugas nga kabataan sa mga hamtong sa katilingban. Naanad naman gud karon ang pagbugal-bugal bisan makasakit na sa uban, palabyon lang ug gani pakpakan pa ug abibahon. Sa laktod, gikonsinti.

Maong dili na ikahibulong kun nganong naay mga batang wala nay pagtahod sa ilang mga magtutudlo, mga ginikanan, otoridad ug sa balaod. Ang pinakagrabe ana, maghimo na og mga bayolenteng krimen nga daw kahadlok sa sangputanan sa ilang buhaton.

Apan unsaon man kun ang ikaduhang ginikanan sa atong mga kabataan maoy magpakita og dili maayong gawi o pamatasan sa diha sa mga eskuylahan? Kung ang mismong magtutudlo walay maayong pamatasan, tuohan pa kaha sila sa ilang mga estudyante?