Mas mabigat na parusa sa loose firearms, giit

MANILA, Philippines — Isinusulong ni Assistant Majority Leader Javier Miguel L. Benitez, kinatawan ng Negros Occidental Third District, ang panukalang batas na magpapataw ng mas mabigat na parusa sa mga loose firearm offenses matapos ang magkasunod na insidente ng pamamaril sa Ateneo de Zamboanga at Tacloban City.

Sa kanyang panukalang Final Firearms Amnesty and Loose Firearms Accountability Act of 2026, nais ni Benitez na amyendahan ang Republic Act No. 10591, ipawalang-bisa ang RA 8294, at alisin ang mga probisyon ng Presidential Decree No. 1866 na hindi tugma rito.

Layunin ng panukala na gawing non-bailable offense ang pagmamay-ari ng hindi rehistradong baril, habang bibigyan ng 120 araw na palugit ang mga may hawak ng loose firearms upang gawing legal ang kanilang pagmamay-ari. Sa panahong ito, tatanggalin ang delinquency fees, surcharge, at multa, ibababa ang registration fees, at libre ang pagpaparehistro para sa mga indigent applicants.

“Our schools should be the safest rooms in the Republic. In 57 days, two of them became crime scenes… That is not justice. This bill fixes the law that failed those families,” pahayag ni Benitez.

Batay sa datos ng Philippine National Police (PNP), tinatayang may 1.7 milyong loose firearms sa bansa, kumpara sa 4.12 milyong rehistradong baril, at 700,000 na paso na ang rehistro.

Inaatasan din ng panukala ang PNP na magtayo ng one-stop centers sa bawat provincial capital at highly urbanized city, at magpadala ng mobile registration teams sa mga rural, isla, kabundukan, at agricultural communities. Dapat ding magtakda ng simple at abot-kayang proseso para sa pagpaparehistro ng heirloom firearms at mga baril na may cultural o indigenous significance.