Presidente, VP bawal sa negosyo

MANILA, Philippines — Mahigpit na ipinagbabawal ng 1987 Constitution sa Pangulo at Pangalawang Pangulo ng bansa ang direkta o hindi direktang pakikilahok sa negosyo habang nakaupo sa puwesto.

Ito ang binigyang-diin ni dating Sandiganbayan Presiding Justice Amparo Cabotaje-Tang, na iprinisinta ng prosekusyon sa Senate impeachment court bilang legal na pamantayan sa pagbusisi ng kasong unexplained wealth laban kay Vice President Sara Duterte.

Sa direct examination ni House impeachment prosecutor Akbayan Rep. Chel Diokno, tinanong kung maaaring mangasiwa o magpartisipa sa ­negosyo ang Pangulo at Bise Presidente habang nasa puwesto.

Tinukoy ni Cabotaje-Tang ang Section 13, Article VII ng Konstitusyon na nagbabawal sa Pangulo, Vice President, mga miyembro ng gabinete, at mga deputies o assistants na direkta o hindi direktang makilahok sa negosyo; magpraktis ng ibang propesyon; magkaroon ng pinansyal na interes sa kontrata ng gobyerno, at humawak ng franchise o espesyal na pribilehiyo.

Ipinaliwanag ni Cabotaje-Tang na ang “indirect participation” ay nanga­ngahulugang ibang tao ang guma­gawa ng negosyo sa pangalan ng opisyal, ngunit sila pa rin ang tunay na nakikinabang bilang beneficial owner.

Binigyang-diin pa niya na mas mahigpit ang restriksiyon sa Pangulo at Bise Presidente dahil sa lawak ng kapangyarihan ng kanilang mga posisyon.