I-cancel ang business permit

Wala tugoti sa Prime Waste Solution ang dakbayan sa Sugbo nga makalabay sa basura niini tungod kay matud pa partial pa lamang ang paglibkas sa Department of Environment and Natural Resources (DENR) sa gipagawas niini nga Cease and Desist Order (CDO) batok sa Prime Waste.

Pero sa pagkatinuod duda ko nga ang wala pagdawat sa Prime Waste sa basura gikan sa dakbayan sa Sugbo mao ang privilege speech sa usa ka konsehal sa dakbayan sa Sugbo nga nag-question sa pagbalik sa operasyon sa Prime Waste bisan pa og wala pa gayod malibkas sa hingpit ang CDO nga gipagawas sa DENR.

Dili ko moangal sa wala pagdawat sa Prime Waste sa basura nga ilabay sa dakbayan sa Sugbo diha sa Binaliw Landfill kun wala pa unta dawata ang basura nga gilabay gikan sa mga pribado nga kompanya ug mga local government units.

Sigun sa hunghong sa akong amigo nga duwende, nagsige na og dawat ang Prime Waste Solution og basura nga ilang gipalabay sa Binaliw landfill. Manghinaut lang ko nga nasayop sa iyang gisulti kanako ang akong amigo nga duwende.

Pero duda ko nga ang nakahibawo pod si Mayor Nestor Archival sa gisulti sa duwende kanako kay sa balita sa among sibyaanan Xfm 88.3 Cebu tun-an man sa Mayor ang sugyot nga kanselahon ang Business Permit sa Prime Waste Solution tungod sa wala pagdawat niini o pagtugot niini nga makalabay ang dakbayan sa Sugbo sa iyang basura diha sa Binaliw Landfill.

Akong unsolicited nga tambag ngadto ni Mayor Nestor Archival, kanselaha ang Business Permit sa Prime Waste kay ingrato. Naa sila nag operate sa dakbayan sa Sugbo sa ilang negosyo nga gihimo nila ang siyudad nga labayanan og basura unya dili hinuon ta makalabay sa atong basura. Adto na hinuon ta maglabay og basura sa lungsod sa Aloguinsan. Kanselaha ang Business Permit Mayo.