PNP sa mga magulang: Tumawag sa 911
Kung may pagbabago sa ugali ng anak
MANILA, Philippines — Pinayuhan ng Philippine National Police (PNP) ang mga magulang na agad tumawag sa 911 o humingi ng tulong sa pinakamalapit na himpilan ng pulisya kung mapapansin ang hindi pangkaraniwang pagbabago sa pag-uugali ng kanilang mga anak upang maagapan ang posibleng pagkakasangkot ng mga ito sa mga online extremist group.
Ayon kay PNP Chief PGen. Jose Melencio Nartatez Jr., mahalagang mabantayan ng mga magulang ang online activities ng kanilang mga anak dahil maaaring magbunga ng negatibong epekto ang labis na pagkakalantad sa online violence at iba pang mapaminsalang nilalaman. Aniya, bukas ang 911 upang magbigay ng agarang interbensyon sa mga kasong may kaugnayan sa online threats.
Ang pahayag ng PNP ay kasunod ng ibinunyag ni Senador Risa Hontiveros na ang umano’y groomer ng mga menor de edad na sangkot sa pamamaril sa Tacloban City ay may hinihinalang koneksiyon sa isang transnational online group na umano’y nag-uudyok ng karahasan at ekstremismo sa mga kabataan.
Sinabi ng PNP na patuloy nilang sinisiyasat ang posibleng ugnayan ng naturang grupo sa pagrerekrut ng mga menor- de-edad. Pinakilos na rin niya ang Anti Cyber Group upang ma-trace ang mga posibleng pinanggagaling nang mararahas na laro.
Binigyang-diin ni Nartatez na patuloy ang pakikipag-ugnayan ng PNP sa mga dayuhang law enforcement agencies upang matukoy at mapigil ang operasyon ng mga grupong nagsasamantala sa mga kabataan sa online platform.
- Latest
