2 obrero patay sa gumuhong hukay

MANILA, Philippines — Dalawa sa limang construction worker ang nasawi nang gumuho ang kanilang hinuhukay na 18-meter na water pipeline project ng Maynilad nitong Linggo ng hapon sa Brgy. Pamplona II, Las Piñas City.

Ayon kay Las Piñas City Police assistant police chief for operations, Lt. Colonel Teoson Rosarito, umaga nitong Lunes nang nakuha ang bangkay ng dalawang trabahador na na-trap sa hukay. Unang nailigtas ng rescue teams bandang alas-4:30 ng hapon kamakalawa ang tatlo sa Aquarius St.

Kinumpirma naman ni Bureau of Fire Protection (BFP)-Las Piñas City Fire Marshal, Supt. Sonny Carlo ang dalawang biktima na wala ng buhay nang ma-retrieve alas 6:30 ng umaga ng Lunes.

Samantala, kinumpirma ng Maynilad na sinuspinde na nila kaagad ang paghuhukay dahil sa insidente at nakipag-ugnayan din sa BFP, local disaster response unit at barangay na nakasasakop sa lugar.

“Our thoughts are with the workers and their families during this difficult time. We are coordinating with our contractor to ensure that the affected workers and their families receive the necessary assistance and support,” Maynilad said. 

Naapektuhan din ang water services sa lugar na konektado sa nasabing pipeline.