Gardo papasok sa PAR ngayong Huwebes

MANILA, Philippines — Nagbabantang pumasok sa Philippine Area of Responsibility (PAR) ang Tropical Storm Higos ngayong Huwebes, June 25.

Ayon sa Pagasa, oras na pumasok sa PAR si Higos, ito ay tatawaging bagyong Gardo.

Kahapon, alas-10 ng umaga, si Higos ay huling namataan sa layong 2,120 kilometro silangan ng Gitnang Luzon at patuloy na kumikilos sa kanluran hilagang kanluran sa bilis na 20 km bawat oras.

Taglay ni Higos ang lakas ng hangin na umaabot sa 65 km bawat oras at m pagbugso na 80 km bawat oras.

Sa ngayon si Higos ay walang direktahang epekto sa lagay ng panahon at kondisyon ng karagatan sa bansa.

Samantala, patuloy naman ang paghina ng bagyong Francisco habang kumikilos sa hilagang bahagi ng bansa na inaasahang lalabas ng PAR sa Biyernes.

Huling namataan ang sentro ni Francisco sa Basco, Batanes na nagpapaulan din sa hilagang bahagi ng bansa.