P10 taas pasahe sa jeep, itinulak ng PISTON

MANILA, Philippines — Nagsampa na ng P10 fare hike petition ang transport group na Pinagkaisang Samahan ng mga Tsuper at Operators Nationwide (PISTON) sa Land Transportation Franchising and Regulatory Board (LTFRB).

Kung mapapagbigyan, nais ng PISTON na ma­ging P23 ang minimum pasahe sa jeep mula sa kasalukuyang P13.

Ayon kay PISTON President Mody Floranda, hindi nakatulong at pansamantala lamang na natakpan ang gastusin ng mga driver sa ipinamimigay na fuel subsidy ng pamahalaan dahil one time lamang ito kayat dama pa rin nila hanggang ngayon ang epekto ng mataas na presyo ng produktong petrolyo.

Aniya, hindi rin tuluyang nakatulong ang pansamantalang suspension ng excise tax sa LPG at kerosene dahil tumaas naman ang presyo ng bilihin at iba pang serbisyo tulad ng maintenance fee ng mga sasakyan na na­ging epekto ng tuminding oil price hike.

Kinundisyon lamang aniya ng naturang mga pampakalma ang hanay ng mga tsuper.

Aniya, mas nais nilang maipatupad ang P10 taas sa minimum na pasahe dahil ito ay pang matagalang makakatulong sa kabuhayan ng mga operator at driver.

Masyado aniyang maliit ang naipagkaloob na P1 fare hike ng LTFRB para sa mga traditional jeepneys sa bansa.

Binigyang diin din nito na nagkakaroon nga ng maliitang oil price rollback sa ngayon pero hindi pa umabot sa halaga ng nagdaang pagtaas na presyo ng petrolyo na kung susumahin ay wala pa sa kalahati ng naibaba sa presyo ng petrolyo sa ngayon.

Sa panig ng LTFRB, ang petisyon ay agad nilang uupuan.