PSAHelpline accessible na via GCash app

MANILA, Philippines – Nagsanib-puwersa ang GCash, Philippine Statistics Authority (PSA) at ang Pilipinas Teleserv sa paglulunsad ng PSAHelpline Mini App sa loob ng GCash application. Layunin nitong padaliin at pabilisin ang pagkuha ng civil registry documents ng mga Pilipino anumang oras at saan mang lugar.

Sa pamamagitan ng mini app, maaaring umorder ang mga user ng mga sertipiko mula sa PSA tulad ng birth, marriage, at death certificates, pati na ang CENOMAR at CENODEATH. Maaari silang pumili kung e-copy (PDF) o home delivery ang nais, at magbayad nang direkta gamit ang kanilang GCash e-wallet.

Layunin ng integrasyong ito na ilapit ang mahahalagang serbisyo ng pamahalaan sa milyun-milyong Pilipino sa pamamagitan ng isang mapagkakatiwalaan at araw-araw na ginagamit na platform.

Sa paglulunsad nito, ang GCash ang kauna-unahang e-wallet na nag-host ng PSAHelpline.ph sa loob mismo ng app, at ang una ring nag-alok ng PDF civil registry certificates. Ang PSAHelpline naman ang kauna-unahang government service na naging available sa GLife.

Dinisenyo ang PSAHelpline Mini App upang gawing mas maayos ang buong proseso ng pagkuha ng civil registry documents mula sa paglalagay ng request hanggang sa pagbabayad at delivery. Malaki ang maitutulong nito lalo na sa mga nasa malalayong lugar upang matiyak ang maagap, ligtas, at maaasahang access sa mahahalagang dokumento.

“We extend our deepest gratitude to our partners, the PSA and Teleserv, for the trust and for being our first government service app to be integrated inside GCash,” ayon kay GCash VP and Head of Public Sector Cleo Celeste Santos.

“At GCash, we believe financial inclusion starts with identity. By making essential civil registry documents easier to access, we are helping more Filipinos participate in the digital economy and access the opportunities they deserve,” dagdag pa niya.

Ayon sa mga nabanggit na ahensya, nagsisilbing matibay na halimbawa ang kolaborasyon ng PSA, Pilipinas Teleserv, at GCash para sa mga susunod pang digital government initiatives. Ipinapakita nito kung ano ang maaaring makamit kapag nagtutulungan ang pampubliko at pribadong sektor.

“The PSA Helpline Mini App within the GCash app simplifies how Filipinos request civil registry documents by integrating secure requests and payments into a trusted digital platform. This partnership reflects our vision of a citizen-centered and digitally enabled government that delivers faster, more convenient public service to every Filipino wherever they may be,” sabi ni PSA National Statistician Claire Dennis Mapa.

Binigyang-diin din ang kahalagahan ng data privacy at seguridad lalo na’t umaasa ang milyun-milyong Pilipino sa mga dokumentong inilalabas ng PSA para sa employment, edukasyon, travel, benepisyo, at iba pang legal na transaksyon.

Samantala, iginiit naman ng Pilipinas Teleserv, ang matagal ng partner ng PSA para sa PSAHelpline service, na mas pinagtitibay ng GCash infrastructure ang integridad ng proseso ng pag-request ng mga legal na dokumento.

“GCash has a robust KYC process, which PSAHelpline will fully leverage to ensure that only document owners and properly authorized requesters can apply for PSA certificate,” saad ni Pilipinas Teleserv Managing Director and Founder Jun Yupitun.