BOC official pinasisibak, naniningil ng bayad sa travel authority at promotion
MANILA, Philippines — Lumiham ang rank and file ng Bureau of Customs (BOC) kay Comm. Bienvenido Rubio hinggil sa paniningil umano ng isang opisyal ng Aduana ng pera sa mga empleyado sa tuwing sila ay mag-aaply ng travel authority para makapagbiyahe.
Ang travel authority ay kailangan ng mga kawani ng gobyerno kapag sila ay mag-aabroad para sa isang seminar, schooling o bakasyon.
Hiling ng mga empleyado kay Comm. Rubio na sibakin ang isang opisyal ng Internal Administration Group (IAG) dahil sa paniningil umano ng P2,000 bayad para sa simpleng travel authority issuance personal o official gayong libre naman dapat daw ito.
Sa naturang liham, na pinadalhan din ng kopya ang House of Representatives at Department of Finance, inirereklamo din ang nasabing opisyal ng umano’y pangingikil sa mga empleyadong gustong ma-promote.
Ang isang Customs security officer para ma-promote bilang Special Agent 1, kailangan umanong magbayad ng P200,000-P500,000; P500,000-P1 million sa IAG official para sa Assistant Customs Operations Officer 1; P3 milyon sa COO 2 at COO 3; P5 million daw sa Customs Operations 5. Pati umano pagpapalipat lang ng assignment o lugar ng trabaho ay may bayad din sa opisyal.
- Latest
