Bulacan idineklara nang ‘bird flu free’

MANILA, Philippines — Malaya na sa H5N1 avian influenza o bird flu ang lalawigan ng Bulacan.

Ito ang idineklara ni Agriculture Secretary Francisco P. Tiu Laurel Jr. matapos ang 90 na araw nang isagawa ang paglilinis at disinfection ng mga pasilidad ng manok.

Naitala ang unang impeksyon sa H5N1 sa Bulacan noong Enero 2022 hanggang Pebrero 2023 matapos na makitaan ng DA ng ilang kaso sa Baliwag City, mga bayan ng Pulilan, Santa Maria, San Rafael, San Miguel at San Ildefonso.

Batay sa monitoring reports ng Bureau of Animal Industry, naitala ang impeksyon sa mga pato, native chicken, chicken layers, at broiler feeders.

Bago ang deklarasyon, nagpatupad ang DA na mahigpit na hakbang, kabilang ang depopulation, disinfection, at logistics restrictions, sa 135 poultry facilities sa Bulacan.

Inilagay din ang surveillance zones ng isa hanggang pitong kilometro sa paligid ng infected farms.

Ang huling H5N1 infection ay iniulat sa game fowl farm sa Santa Maria noong Mayo 2023.