Raffy Tulfo walang planong magpresidente
Kahit No. 1 sa survey
MANILA, Philippines — Hindi ikinokonsidera ni Sen. Raffy Tulfo na tumakbong presidente ng bansa na para sa kanya ay isang sakit sa ulo.
“Wala sa utak ko ang pagtakbo as president sa 2028,” ani Tulfo sa isang panayam sa telebisyon matapos lumabas sa isang survey kamakailan na nagpapakita na isa siya sa pinakagustong presidential bet ng mga respondents.
Ayon kay Tulfo, sa ngayon ay pinagtutuunan niya ng pansin ang trabaho bilang senador.
“Naka-focus ako ngayon sa Senado and I’m enjoying being a senator. I’m enjoying that much being a senator,” ani Tulfo.
Binanggit din ni Tulfo na sakit sa ulo ang pagtakbo bilang pangulo lalo pa’t napakarami ng fake news kung saan binabatikos siya.
“At saka isa pa, e sakit sa ulo lang yan. Sa ngayon pa nga, ang dami ko ng sakit sa ulo, left and right marami nang nagagalit sakin because of all these surveys… yung mga fake news bina-bash ako etc. So much more, pag ikaw ay nandun na, pag ikaw tatakbo, ” ani Tulfo.
Sinabi rin ni Tulfo na iba ang pagtakbo sa pinakamataas na posisyon kaysa sa pagtakbo bilang senador.
Tungkol sa kanyang nakababatang kapatid na si ACT-CIS Rep. Erwin Tulfo, sinabi ng senador na ipaubaya na niya sa kanya ang desisyon kung tatakbo o hindi sa 2025 senatorial race.
Idinagdag ni Tulfo na hindi niya maaaring pigilan ang kanyang mga kapatid kung gusto nilang kumandidato dahil hindi naman niya hawak sa leeg ang mga ito.
- Latest
