Botanteng nagparehistro sa 2025 midterm polls, 1.9 milyon na
MANILA, Philippines — Umaabot na sa 1.9 milyon ang mga bagong botante na nagpatala para makaboto sa May 2025 National and Local Elections (NLE).
Sa datos ng Comelec, hanggang nitong Lunes, Abril 8, umaabot na sa 1,920,887 ang bagong voter registrations na kanilang natanggap.
Kabilang na anila dito ang nagparehistro sa kanilang punong tanggapan sa Intramuros, Maynila.
Ang naturang numero ay higit isang milyon na lamang na kulang para maabot ng Comelec ang kanilang target na makapagrehistro ng tatlong milyong botante para sa midterm elections.
Pinakamarami umanong nagpatala sa Region 4A na nasa 350,923, sumunod ang National Capital Region (NCR), 284,921; Region 3 - 217,151; Region 7 - 138,867; at Region 11 - 121,024.
Ang voter registration ay sinimulan noong Pebrero 12 at nakatakdang magtapos sa Setyembre 30.
Kumpiyansa ang Comelec na maaabot nila ang naturang target bago tuluyang magtapos ang registration period.
- Latest
