Velasco binanatan ng Duterte supporters sa pagkampi sa solons sa ‘red-tagging’

MANILA, Philippines — Kinuwestyon ng mga supporter ni Pangu­long Rodrigo Duterte ang gina-wang pagkampi ni House Speaker Lord Allan Jay Velasco sa mga solon sa red-tagging issue.

Sinabi ng mga ito na malinaw umanong pagbalewala kay Pangulong Duterte at pangmamaliit sa kakayahan ng militar sa pangangalap ng impormasyon laban sa Communist Party of the Philippines-New People’s Army (CPP-NPA) ang naging hakbang na ito ni Velasco.

Kasabay nito, hinamon naman nila si Velasco na patunayang malapit na kaalyado siya nina Pangu­long Rodrigo Duterte at Davao City Mayor Sara Duterte-Carpio.

Sa kanilang Youtube Channel, sinabi ng mga ito na sa ginawang pagtatanggol ni Velasco sa Makabayan Bloc ay ipinakikita lamang nitong wala siyang nalalaman sa isyu ng CPP-NPA.

“Kung talagang kay Pangulong Duterte ka, sumunod ka sa kumpas ng Pangulo hindi naman sila mag-aakusa nang walang ebidensya, sinasabi mong careless accusations si Lt. Gen. (Antonio) Parlade Jr., hindi sila careless, puno ng ebidensya, hindi ka na­nonood, wala kang internet?” anang DDS.?

Una rito, nagpasala­mat sina Bayan Muna Rep. Carlos Isagani Zarate at Act Teachers Partylist Rep. France Castro kay Ve­­las­co sa ginawa nitong pagtatanggol sa kanila sa red-tagging ni Parlade, spokesman ng National Task Force to End Local Communist Armed Conflict (NTF-ELCAC) kung saan na­ramdaman umano nilang protektado sila ni Velasco.

Sinabi ng mga supporters ni Pangulong Du­terte na dalawa lamang ang nakikita nilang dahilan ng pagkampi ni Velasco sa Makabayan Bloc, una ay natatakot siyang banggain ang CPP-NPA dahil mayroong mga NPA sa distrito nito sa Marinduque o mapapakinabangan niya sa 2022 election ang mga ito.