Patay sa Jolo bombing, 22 na
MANILA, Philippines — Umaabot na sa 22 katao ang nasawi sa twin bombing ng Jolo Cathedral noong Enero 27 matapos na isa pang ginang ang bawian ng buhay sa pagamutan.
Sinabi ni AFP Western Mindanao Command Spokesman Col. Gerry Besana, na ang biktimang si Thelma Villanueva ay binawian ng buhay sa Intensive Care Unit (ICU) ng Zamboanga City Medical Center.
Ang labi ni Villanueva, 68, ay dadalhin ng kaniyang pamilya sa Basilan.
Kabilang sa 22 nasawi ay anim na sundalo, isang miyembro ng Philippine Coast Guard (PCG) at 15 sibilyan habang nasa 110 ang nasugatan.
Matatandaang niyanig ng magkasunod na pagsabog ang Our Lady of Mt. Carmel Cathedral sa Jolo habang idinaraos ang misa sa lugar. Ang unang bomba ay sumabog sa loob habang ang isa ay sa labas ng simbahan.
Inako ng Islamic State of Iraq and Syria (ISIS) ang pambobomba habang tinukoy naman ng AFP at PNP na ang Ajang-Ajang group na kaalyado ng Abu Sayyaf ang nasa likod ng pagpapasabog.
Apat na persons of interest ang tinukoy pero inabsuwelto at pinalaya rin ng mga awtoridad.
- Latest
