Nakulong ng walang kasalanan dapat bayaran

MANILA, Philippines - Isang araw matapos mapawalang-sala ng Su­­preme Court si Hubert Webb at anim pang aku­sado sa 1991 Vizconde massacre, iginiit ni Se­n. Jinggoy Estrada na dapat magkaroon ng batas na mag-uutos sa gobyerno na bayaran ang mga na­bilanggo pero napatuna­yan na wala namang ka­sa­lanan.

Sa Senate Bill 432 na inihain ni Estrada, sinabi nito na dapat itama ng estado ang pagkakamali sa isang indibiduwal na napagkaitan ng hustisya at nakulong pero napatunayang hindi guilty sa ibinibintang na krimen.

Ayon kay Estrada ba­gaman at nakapiring na babae ang kumakatawan sa justice system ng bansa, hindi ma­iiwasan na magkaroon ng pagkakamali ang hus­gado sa pagpapataw ng parusa kaya may nakukulong ng walang kasalanan.

Kung magiging batas, ang Department of Justice ang mangangasiwa sa pagbabayad sa indibiduwal na nakulong pero napatunayan na wala namang kasalanan.

Ibabatay ang mone­tary compensation sa ha­laga ng kinikita ng akusado bago siya nabilanggo.