Customs official 2 beses nagpakasal, sinuspinde
MANILA, Philippines - Isang mataas na opisyal ng Bureau of Customs sa Subic ang sinuspinde ng Court of Appeals (CA) matapos umanong magpakasal ng dalawang beses.
Sa 20-pahinang desisyon ng CA 22th division na sinulat ni Associate Justice Danton Q. Bueser, hinatulang guilty sa kasong administratibo si Subic Customs Collector Atty. Marietta D. Zamoranos.
Sa ilalim ng Rule IV ng Uniform Rules sa Administrative Cases ng Civil Service, ang disgraceful at immoral conduct ay maituturing na grave offense na kinakastigo sa pamamagitan ng suspensiyon mula anim na buwan hanggang isang taon sa unang offense at pagkakatanggal naman sa serbisyo sa second offense.
Binaligtad ng CA ang resolusyon ng Civil Service Commission (CSC) na nag-aabswelto kay Zamoranos sa reklamong disgraceful at immoral conduct.
Nagkamali anya ang CSC nang idismis nito ang administrative complaint laban kay Zamoranos matapos matuklasan na ang reklamo ay mayroong sapat na basehan.
Napahamak si Zamoranos sa sariling testimonya na siya ay Muslim convert na taliwas naman sa inihain niya sa korte na hindi siya naging Muslim kailanman.
Ang kaso ay nag-ugat sa reklamo ni Samson R. Pacasum Sr. sa CSC noong December 14, 2004 kung saan binanggit na nagpakasal siya kay Zamoranos noong Dec. 28, 1992. Ang complainant ay isang Muslim habang si Zamoranos ay Roman Catholic.
Ngunit natuklasan na si Zamoranos ay kasal kay Jesus de Guzman noong July 30, 1982.
Dahil dito, binalewala rin ng korte ang depensa ni Zamoranos na siya ay Muslim kaya ang kanyang kasal kay de Guzman noong July 30, 1982 ay isang ceremonial affair lamang dahil kasal na siya kay de Guzman noong May 3, 1982 sa pamamagitan ng Muslim wedding at napawalang-bisa na ito noong December 18, 1983.
Ang kasal naman ni Zamoranos kay Pacasum ay naganap noong December 20, 1989 sa harap ni Iligan RTC Judge Valerio Salazar.
Dahil dito, ang kasal ni Zamoranos noong July 30, 1982 ay umiiral pa rin sa kabila ng pagkaka-divorce ng kanyang Muslim wedding kay de Guzman sa Basilan.
- Latest
- Trending
