Senior Citizens party-list top 3 sa Dec. survey – SWS

MANILA, Philippines — Pumangatlo ang Senior Citizens party-list na nakakuha ng 4.62% sa isinagawang Voter Preference for Party-list survey ng Social Weather Station (SWS) nitong Disyembre 12-18.

Una ang 4Ps Party-list na may 13.51% at sumunod ang ACT-CIS na may 5.63%.

Mauupo ang tatlong nominado ng 4Ps at dalawa naman sa mga nominado ng ACT-CIS at Senior Citizens kung isasagawa ang halalan ngayon.

Ang lima pang party-list groups na nakakuha ng higit dalawang porsiyento ay ang Duterte Youth, Ako Bicol, Tingog, TGP at Uswag Ilonggo.

Base sa batas na gumagabay sa party-list groups, ang makakakuha ng dalawang porsyento sa kabuuang bilang ng boto ay garantisadong uupo ang kanilang unang nominado bilang miyembro ng Kamara.

Sinabi ni Senior Citizens Rep. Rodolfo “Ompong” Ordanes na pagpapakita lamang ito na maraming botante ngayon ang pinipili ang party-list groups na isinusulong ang kapakanan ng mga mahihirap, senior citizen at walang trabaho.

“Nais ng ating mga kababayan na magkaroon ng tunay na boses sa Kongreso ang sektor ng lipunan na hindi masyadong nabibigyan ng pansin,” dagdag pa ng mambabatas.

Ngayong taon, ibibigay na ang P10,000 cash gift sa mga edad 80, 85, 90 at 95 na kabilang sa mga isinulong na panukalang batas ni Ordanes noong nakaraang taon.