Acting mayor sinampal

CAMP SIMEON OLA , Legazpi City, Philippines — Dahil sa hindi nilagdaan ang isang sulat, sinampal ng isang casual na empleyado ang tumatayong acting City Mayor ng Ligao City kahapon ng umaga sa loob ng opisina nito.

Nakilala ang biktima na si Vice Mayor Alfonso Saret, 66, may asawa, acting mayor ng naturang lungsod at residente ng Barangay Calzada dito.

Ang suspek ay kinilalang si Liberato Prollamante aka Pepot, 43, may asawa casual na empleyadong lungsod at residente ng Barangay Calzada.

Nabatid na bigla na lamang na pumasok sa loob ng opisina ng biktima ang suspek at galit na galit ito dahil sa sulat na ginawa ng kapatid ng suspek na si City Councilor Vida Maria Corazon Prollamante at hindi pinirmahan ng biktima.

Napagalaman na bago naganap ang pananampal sa biktima ang dalawa ay nagkaroon ng mainitang pagtatalo hanggang sa lapitan ng suspek ang opisyal ng bayan at walang sabing sampalin ito kahit sa harapan ng mga ibang empleyado ng City Hall. (Ed Casulla)