Pinoy guard binugbog ng 3 teenager sa Kuwait

MANILA, Philippines - Isang Pinoy security guard ang pinagtulungang bugbugin at batuhin sa ulo ng tatlong Kuwaiti teenager habang naka-duty at binabantayan ang isang grocery center sa bansang Kuwait. 

Sa ulat na nakarating ka­hapon sa tanggapan ng Department of Foreign Affairs (DFA), kaagad na­mang naisugod sa paga­mutan at nailigtas mula sa tiyak na kamatayan ang Pinoy na si Lito Bugos.

Naganap ang insidente noong Hulyo 6, dakong alas-10 ng gabi sa grocery store na pinagtatraba­huhan ng biktima.

Sinita umano ni Bugos ang isa sa mga teenager dahil sa paglabas nito sa grocery store matapos na dumaan sa entrance door.

Dahil dito, nagalit uma­no ang isa pang teenager na kasama ng sinita ni Bugos, at sinuntok ang Pinoy.

Umalis umano ang mga suspek ngunit mata­pos ang 20 minuto ay muling bumalik, kaya’t hindi na sila pinayagan pa ng mga guwardiya na ma­kapasok muli sa grocery store.

Lalo umano itong ikina­galit ng mga teenager na naging dahilan ng pagsik­lab ng bagong komosyon at muli umanong pinag­susuntok ng mga suspek ang Pinoy.

Nagawa naman uma­nong awatin ng isang gu­wardiya ang isang suspek, habang ang isa ay nakiki­pagbuno umano sa Pinoy, ngunit hindi nila napansin na dumampot ng bato ang ikatlong suspek at binato si Bugos na tinamaan ng matindi sa ulo.

Nabatid na dalawa la­mang sa mga suspek ang naaresto habang isinugod naman sa pagamutan si Bugos na sumailalim sa craniotomy upang maalis ang namuong dugo sa kanyang ulo.

Sa kasalukuyan ay ti­nutulungan na umano ng Philippine Embassy si Bu­gos sa isinampang kaso nito laban sa mga suspek. (Mer Layson)