Doktor ni Jacko iniimbestigahan na

MANILA, Philippines - Kasalukuyang iniim­bes­ti­gahan ng Los Angeles Police ang personal na doctor ng yumaong King of pop star na si Michael Jackson kaugnay ng mga gamot na iniinom nito noong buhay pa dahil sa hinalang na-overdose sa pain killer ang singer.

Nang unang mapan­sing hindi humihinga si Jackson sa tinutuluyan niyang mansion sa Los Angeles, California sa United States, ang tumi­tingin sa kanya at nagtang­kang sa­ gipin siya sa huling sandali ay ang sarili niyang cardiologist na si Dr. Con­rad Murray.

Dahil dito, kukuwestyu­nin ng pulisya si Murray na nanggagamot sa California, Nevada at Texas.

Kinumpiska rin ng pu­lisya ang kotse ni Murray para tignan kung merong nakatago ritong mga ga­mot.

Nakausap na anya agad ng mga pulis si Mur­ray makaraang mamatay si Jackson pero gusto pa nila itong imbestigahan.

Sa kabila nito, idiniin ng pulisya na hindi suspek si Murray bukod sa nakiki­pag­tulungan naman ito sa kanila.

Kasabay nito, sinabi ng coroner’s office na walang indikasyong may foul play sa pagkamatay ng singer noong Huwebes pero aabutin pa ng apat hang­gang anim na linggo bago malinawan ang tunay na dahilan ng kanyang pag­kamatay. Kabilang sa sinusuri kung may kinala­man dito ang mga gamot na iniinom ni Jackson.

Ayon sa tagapagsalita ng coroner, may mga ini­inom na gamot si Jackson noong buhay pa ito pero hindi niya tinukoy kung anong klaseng gamot.

Ayon sa mga ulat, may tumawag sa emergency hotline na 911 hinggil sa kalagayan ni Jackson. Nagtungo ang fire paramedics sa mansiyon at dinala si Jackson sa UCLA Medical Center pero doon na ito binawian ng buhay.

Isang assistant police chief ng Los Angeles Police Department na si Charlie Beck ang nagsa­bing ma­aga pa para mag­karoon ng konklusyon sa pagkamatay ni Jackson na naunang idineklara ng mga duktor na inatake sa puso.

Samantala, kinuku­westyon ng mga awtoridad ang pagkuha ni Jackson ng serbisyo ni Murray.

Nasa Los Angeles ng panahong iyon si Jackson para sa pagpapraktis sa kanyang mga concert na nakatakdang simulan sa London sa England sa susunod na buwan.            

Hiningi niya sa promoter ng concert na AEG Live na kunin si Murray para isama niya sa London. (Wires)