Sentensyadong Pinay DH binigyan ng pardon

MANILA, Philippines – Inaasahang maka­lalaya at makakauwi na sa Pilipinas ang isang domestic helper na Pi­lipina na naunang hi­natulang mabitay sa Kuwait dahil sa kasong pagpatay matapos na pagkalooban ito ng par­­don ng emir ng natu­rang bansa.

Batay sa ulat ni Department of Foreign Affairs Undersecretary for Migrant Workers Affairs Esteban Cone­jos Jr., inihahanda na ng Philippine Embassy sa Kuwait ang mga kauku­lang dokumento para makauwi ang na­turang Pilipina na si May Vecina.

Si Vecina ay hina­tulang mabitay ng Kuwaiti courts dahil sa pagpatay kay Salem Sulaiman Al-Otaib, ang pitong taong gulang na anak na lalaki ng kanyang amo, at tang­kang pagpatay sa mga kapatid ng biktima na sina Abdulla, 13, na gi­ni­litan umano ng leeg at ni Hajer, 17, na si­nak­ sak naman umano nito noong Enero 6, 2007.

Ikinatwiran ni Ve­ci­na na nagawa lamang niya ang krimen ma­ta­pos na dumanas uma­no siya ng physical at mental abuse mula sa kamay ng kanyang mga employer na na­ging sanhi upang ma­wala siya sa kanyang tamang pag-iisip.

Pero, dahil sa apela ng pamahalaang Pili­pino, ibinaba ng emir ang hatol kay Vecina at ginawang habam­bu­hay na pagkabilanggo.  

Gayunman, sinabi ni Vice President Noli de Castro sa isang pa­ha­yag kahapon na pinag­kalooban na ng Emir na si Sabah al-Ahmad al-Jaber al-Sabah ng full pardon si Vecina. (Mer Layson)