Utos ni Ping - Mancao

MANILA, Philippines - Si Senador Panfilo Lacson na noo’y hepe ng Presidential Anti-Organized Crime Task Force ang nag-utos umano para iligpit ang kilalang PR man na si Salvador “Bubby” Dacer na iki­namatay din ng driver nitong si Manuel Corbito.

Ito ang laman ng kon­trobersyal na affidavit na nasa pag-iingat ng Department of Justice at nilagdaan ni dating Police Sr. Supt. Cesar Mancao na personal na natung­hayan ng manu­nulat na ito.

Ayon kay Mancao, na­ro­roon siya nang ibigay ni Lacson ang kautusan kay Michael Ray Aquino na noo’y pinuno ng ope­rasyon ng PAOCTF.

Si Mancao noon ang hepe ng Task Force Luzon ng PAOCTF.

Sinabi ni Mancao sa kanyang affidavit na, noong Oktubre 2000, lulan sila ng isang kotse nang marinig niyang itinanong ni Lacson kay Aquino, “’Noy kelan ba titirahin si Delta (Dacer)?

Ang sagot ni Aquino, “Uunahin na muna namin si Bero (dating General Rey­naldo Berroya) mala­pit na kami sa kanya.”

“Pagsabayin na ninyo sila….,” tugon naman ni Lac­son.

Ayon kay Mancao, nang mahalal na senador si Lacson noong 2001, si­nabihan sila nito na mag­tungo at manirahan sila sa Amerika dahil ididiin sila ng bagong admi­nistrasyon sa Dacer-Corbito case.

Sumunod sina Man­cao at Aquino. Sa Florida tumu­loy ang una saman­talang sa New Jersey ang huli.

Gayunman, habang nasa Amerika sila, naki­pag­kita sa kanila si Lac­son sa iba’t ibang petsa sa sumu­nod na dalawang taon.

Noong Setyembre 3 sa pulong nila sa Miami, ina­tasan ng senador si Aquino na hanapin ang mga ari-arian sa U.S. na nakapa­ngalan kay First Gentleman Mike Arroyo na asawa ni Pangulong Gloria Macapa­gal-Arroyo. May nakuha si Aquino kinalaunan na mga ka­uku­lang dokumento pero hindi pa nasiyahan si Lacson kaya nagpahanap pa ito ng iba.

Sa kanyang affidavit, sinabi ni Mancao na lulan sila ng isang kotse pa­tungo sa Greenhills, San Juan nang marinig niya ang utos ni Lacson na ilig­pit sina Dacer at Berroya. Nakaupo siya sa harapan ng kotseng minamaneho ng isang Reynaldo Lopez Oximoso Sr.. Magkatabi sa likod sina Lacson at Aquino.

Isa pang kasamahan ni Mancao sa PAOCTF na si Chief Inspector Glenn Dumlao ang gumawa rin ng isang hiwalay na affidavit na nagsasaad na pinatrabaho kay Chief Inspector Vicente Arnado ang pagdukot kay Dacer.