Ipagagamit sa patrol cars ng mga pulis, mantika fuel

Dahil imposible pa ring bumaba ng tuluyan ang presyo ng mga pro­duktong petrolyo, isang panukalang batas ang isinusulong ngayon sa Senado na naglalayong ihalo sa diesel ang mga pinaglutuang mantika o cooking oil upang ilagay sa patrol cars ng mga pulis.

Iginiit sa Senate Resolution 550 na dapat pag-aralan ng Senate Committees on Public Order and Illegal Drugs at Energy ang paggamit ng pinaghalong cooking-oil at diesel sa lahat ng patrol cars ng mga pulis sa bansa at sa iba pang ahensiya ng gobyerno.

Nakasaad sa reso­lusyon na dapat lamang mag-isip ng ibang paraan ang gobyerno upang mabawasan ang gastos sa gitna nang mataas pa ring presyo ng mga pro­duktong petrolyo.

Sa Makati City ay na­gagamit na ng mga patrol cars ng mga pulis ang pinaghalong cooking oil at diesel bilang alternati­bong krudo.

Base umano sa pag-aaral sa Makati, aabot sa P500,000 o kalahating milyon ang matitipid ng gobyerno sa isang taon dahil sa pinaghalong cooking oil at diesel.

Nagtayo na rin ang PNP-Bio Diesel Program ng isang mini-plant o refinery na nagsasala ng mga gamit na cooking oil upang matanggal ang tubig at pagkain na naka­halo dito.

Ang nasalang mantika ay isinasailalim sa cold process sa loob ng wa­long oras at saka ito iniha­halo sa diesel sa pama­ma­gitan ng 40-60 ratio at nagagamit na sa mga sasakyan.

Ilang fast food chains na rin ang nag-boluntaryo na magdo-donate ng ka­nilang nagamit na vegetable oils para ihalo sa diesel.