P10-M ransom kay Ces Drilon

Humihingi ng P10 mil­yong ransom ang mga ban­didong Abu Sayyaf kapalit ng pagpapalaya sa reporter ng ABS-CBN na si Ces Dri­lon at dalawa nitong  came­ramen na dinukot sa Maim­bung, Sulu noong Linggo ng isang grupo ng mga ban­dido na pinamu­munuan umano nina Albader Pa­rad at Gafur Jumdail.

Ayon kay Police Chief Supt. Joel Goltiao, duma­ting sa Sulu sina Drilon noong Sabado dahil sa imbitasyon ni Mindanao State University Professor Octavio Dinampo para magkober sa isang okas­yon.

Bandang Linggo ng umaga, sinundo ni Di­nam­po ang tatlo sa isang university hostel pero sinabat sila ng mga ban­dido sa Kusali, Maim­bung.

Sinabi ni Sulu Police Chief Supt. Julasirim Ka­sim na may hinalang baka di­nala ang tatlong emple­yado ng ABS-CBN sa liblib na lugar ng Indanan.

Sinabi ng mga awtori­dad na tinanggihan ni Drilon na samahan sila ng militar sa pagligid nila sa lalawi­gan.

Sa isang pahayag, naki­usap ang ABS-CBN sa mga mamamahayag na mag-ingat sa pagba­balita para sa kaligtasan ng mga bik­tima. Nakiki­pag-ugna­yan ang kum­panya sa mga pamilya nina Drilon at hi­niling na igalang ang kagus­tuhan ng mga ito na huwag humarap sa media. 

Iniutos na kahapon ni Pangulong Arroyo sa militar at pulisya ang agarang pagsagip kay Drilon at sa mga cameramen na sina Jimmy En­car­­nacion at Angelo Val­de­rama. “The President has already instructed the AFP and PNP to exhaust all means to identify the abductors of Ces Drilon the soonest possible time,” wika ni Deputy Presidential Spokesperson Lorelei Fajardo.

Nag-alok din ng tulong ang Moro Islamic Liberation Front sa pakikipag­negosas­yon sa mga kidnapper.

Si Dinampo ang sina­sabing guide nina Ces para sa misyong ma-interbyu rin si Abu Sayyaf Commander Radulan Sahiron alyas Comman­der Putol na may patong sa ulong P5 milyon.

Ayon sa mga impor­mante, sa Mt. Tumatangis sa Indanan itinatago ng mga kidnappers sina Dri­lon, Encarnacion at Valde­rama na diumano’y gu­war­­dyado ng tinatayang ma­higit 100 armadong ban­dido.

Ang nasabing lugar ay kasalukuyang pinalili­butan na ng tropa ng Philippine Marines at ng pu­lisya upang maiwasang mailipat ng lugar ang nasabing mga bihag.

Nabatid na kumakalat sa text messages ang iba’t-ibang halaga ng ransom demand gaya ng P10M, P20M, P50M at P100M kapalit ng pagpa­palaya sa mga bihag pero sinabi ni Goltiao na ta­nging P10M ang naka­rating sa kani­yang kaala­man kung saan ay hindi pa ito kumpirmado.

Sa kasalukuyan, ayon kay Goltiao, iniimbesti­gahan nila kung ano ang naging papel ni Dinampo sa insidente at kung tala­gang kasama itong dinu­kot. Hindi anya sigurado ang pulisya kung kasama si Dimampo sa mga kinid­nap.  

Ito ang ikalawang pag­kakataon na binihag ng mga bandido ang crew ng ABS-CBN. Una rito ang re­porter na si Maan Ma­capa­gal at crew nitong si Val Cuenca sa kainitan ng coverage sa Sulu hostage crisis noong 2000.