Gastos ng Senado kay Lozada, P2-M!

Dahil posibleng naa­aksaya umano ang pera ng taumbayan, iginiit ka­hapon ni Senate Minority Leader Aquilino Pimentel, Jr., sa Senate Committee on Accounts na imbesti­gahan kung paano gina­gastusan ng Senado ang seguridad nina ZTE witnesses Engr. Rodolfo “Noel” Lozada at Dante Madriga na umabot na sa P2 milyon.

Sinabi ni Pimentel na ikinagulat niya ang bali­tang malaki na ang naga­gastos ng Senado sa pag­bibigay ng proteksiyon kina Lozada at Madriga na pati paglilibot nila sa iba’t ibang parte ng bansa ay ginagastusan ng Ma­taas na Kapulugan ng Kongreso.

Naniniwala si Pimentel na hindi na sakop ng witness protection program ng Senado ang gastos sa paglilibot ni Lozada sa iba’t ibang lugar at pag­sasalita nito sa mga unibersidad.

“I find it very difficult to justify that they would be spending so much money. I understand that, among other things, we are also covering the cost of Mr. Lozada’s going to his commitments outside of Manila to speak before so many audiences and thereby incurring a lot of expenses that are shouldered by the Senate. I do not think that is covered by the witness protection program,” ani Pimentel.

Nilinaw ni Pimentel na hindi naman siya kontra sa pagbibigay ng segu­ridad kina Lozada at Madriga na naging daan para makumpirma ang anomalya sa national broadband network proj­ect pero hindi naman aniya makatarungan na gumastos ng sobra-sobra ang Senado.

Nais silipin ni Pimentel kung totoong malaki ang nagagastos ng Senado dahil sa mga Senate personnel na nakatalaga kay Lozada.

Inutos din ni Pimentel sa Secretariat na agad na magsumite at maglabas ng ulat ukol sa tunay na ginastos ng Senado kay Lozada at Madriaga ka­sama na ang kinain ng mga ito. (Malou Escudero)