Lingguhang taas-krudo tuloy

Inaasahang magka­karoon pa ng mga kasu­nod ang pagtaas sa presyo ng produktong petrolyo sa mga susunod na linggo dahil sa walang humpay na pagtaas ng halaga nito sa pandaig­digang pamilihan na ngayon ay umaabot na sa $103 kada bariles.  

Sinabi ni Energy Secretary Angelo Reyes, uma­abot na sa P2 kada litro ang itinaas sa presyo ng diesel, gasoline at kerosene ngayong bu­wan pa lang ng Marso, ang pina­kahuli ay noong Sabado de Gloria.

Masusundan pa uma­no ito ng ikalimang pag­taas sa halagang 50 sen­timos kada litro ngayong pag­sapit ng weekend.

Sa kabila nito, sinabi ni Land Transportation Franchising Regulatory Board (LTFRB) Chairman na imposible muna ang hini­hinging gawing P8 ang minimum na pasahe ng mga pampasaherong dyip subalit pag-aaralan din nilang maigi ang iba pang paraan para hindi mas­yadong mahirapan ang mga drayber.

Dahil dito, nagpaabot na ng pagkabahala ang United Patriotic Transport Organization of the Philippines (UPTOP) at nana­wagan na ito sa Senado na pagtuunan nang pan­sin ang kapakanan ng transport sektor at hindi lamang sa mga imbes­tigasyon gaya ng ma­anomalyang ZTE-NBN deal.

“Hanapan nila ng pa­raan kung paano pa kami makaka-discount sa krudo para hindi kami mapilitang magtaas ng pamasahe,” sabi ni Vic Dimaano, national chairman ng UPTOP. (Edwin Balasa)