Anime’ komiks gagamitin vs anti-drug campaign

Dahil sa impluwen­syang dulot ng usung-uso ngayon na “anime” sa mga bata, gagamitin ito ng Dangerous Drugs Board (DDB) bilang “campaign material” sa paglaban sa iligal na droga katuwang ang Department of Educa­tion.

Ipapakalat ng DDB at DepEd ang mga “anime ko­miks” sa lahat ng pa­aralan partikular sa mga elementarya upang ma­agang mamulat ang mga batang nasa edad 6-12 anyos sa panganib na dulot ng iligal na droga sa ilalim ng programang “Batang Iwas Droga (BIDA)”.

Sa isang memoran­dum, nagkasundo sina DDB Chairman Sec. An­selmo Avenido, Pagcor Chairman Efraim Genuino, DepEd Secretary Jesli Lapuz at BIDA Foundation Corporate Sec. Josephine Evangelista para sa na­turang programa.

Ang DDB ang magiging “consulting body” para sa paglikha ng aksyon at mga plano para sa programa habang tutustusan naman ang programa ng PAG­COR.  Ang DepED naman ang bahala sa pagpapa­kalat nito sa lahat ng pa­aralan sa buong bansa ha­bang ang BIDA ang ma­ngunguna sa kampanya.

Sa serye ng ipapalabas na komiks, limang estud­yante ang mabibiyayaan ng kapang­yarihan upang maging superheroes at lalaban sa mga “monster drug lords” na “public enemy number 1”.  Pagtu­tuunan ng pan­sin ang ka­pabilidad ng mga kabataan na sa kahit murang edad ay kaya nang lumaban sa iligal na droga. (Danilo Garcia)