Full automation sa ARMM tiniyak

Nagpalabas kahapon ng isang resolusyon ang Comelec en banc na nag­lalayong magpa­tupad na ng “full automation” sa ka­nilang idaraos na halalan sa Autonomous Region in Muslim Mindanao (ARMM) ngayong 2008.

Nakasaad sa resolus­yon na dalawang uri ng teknolohiya na tinatawag na  “direct recording electronic” o DRE at “optical mark reader” o OMR ang  gagamitin sa automated election system sa ARMM.

Ang DRE umano na pagboto gamit ang “touch screen” o “touch pad”, ay  gagamitin sa lalawigan ng Maguindanao habang ang OMR naman ung saan ang mga balota ay bibilangin sa pamamagitan ng mga “specially designed machines” ay gagamitin sa iba pang bahagi ng rehiyon.

Ayon kay Atty. James Arthur Jimenez, tagapag­salita ng Comelec, sa  pamamagitan nang pagga­mit ng dalawang magka­ibang uri ng makina para sa automated elections systems ay malalaman ng komisyon kung maaari na bang magamit din ang nasabing teknolohiya para sa 2010 presidential  elections. (Doris Franche)