Pinoy binanlian ng kumukulong mantika, hinataw pa sa ulo ng gf

Isang Pinoy sa bansang Kuwait ang binuhusan ng kumukulong mantika at pagkatapos ay pinukpok pa sa ulo ng ka-relasyong Pinay matapos magselos ang huli makaraang matuklasang may pamilya palang naiwan sa Pilipinas ang una.

Ayon kay Department of Foreign Affairs (DFA) Charge d’ Affairs Rea Oreta, namatay habang ginagamot sa di pa batid na pagamutan si Rolando Casulang, isang X-ray technician sa Kuwait Military Hospital, dahil sa tinamong lapnos sa mukha at putok na ulo.

Inamin naman ng suspek na nakilalang si Minerva Tayag, isang Pinay at karelasyon ni Casulang sa Kuwait, ang krimen.

Sa pahayag sa mga awtoridad ni Tayag, sinabi nito na nagalit siya nang malamang may asawa at anak ang biktima sa Pilipinas.

Sinabi naman ni Oreta na inaasikaso na nila ang pagpapauwi sa mga labi ng biktima at tiniyak din nito na pareho nilang tutulungan ang pamilya ng biktima at suspek. (Mer Layson)