’Di ako gumigimik — Dodot

Umalma si Pasig City Rep. Robert "Dodot" Jaworski Jr. sa pahayag ni Mayor Vicente Eusebio na gumigimik lang umano siya na may nagpasabog ng kanyang sinasakyang Toyota Innova noong Martes ng hapon sa nasabing lungsod.

Ayon kay Jaworski, hindi niya kailangang gumawa ng gimik o magpahamak ng ibang tao para mapansin dahil mahal siya ng mga taga-Pasig.

"Hindi ko kailangang isugal ang buhay ko, ng kapatid ko at ng ibang tao para lang magpapansin at gumawa ng ganung bagay na ikapapahamak naming pareho," saad ni Jaworski.

Pinuna rin ng kongresista ang ginawang pagdepensa ni Eusebio sa kanyang sarili sa naganap na pagpapasabog ng kanyang sasakyan samantalang wala naman siyang binabanggit na personalidad kung sino ang may gawa nito.

Samantala, tinatayang umaabot sa 500 taga-suporta ni Dodot ang nagtipon-tipon sa plaza sa Pasig City kahapon ng umaga para suportahan ang solon at hilingin ang suspensiyon ni Eusebio. (Edwin Balasa)