FPJ, Nat'l Artist

Pormal nang iprinoklama ni Pangulong Arroyo bilang National Artist ang yumaong si Fernando Poe Jr., kasama ang 6 pa.

Sa bisa ng Presidential Proclamation Nos. 1065 at 1071 na nilagdaan ng Pangulo, hinirang si Poe bilang National Artist for film, habang sina Bienvenido Lumbera ay sa literature; Ramon Obusan, dance; Benedicto Cabrera, visual arts (painting); Ildefonso Santos, architecture; Ramon Valera (posthumous), architecture, design at allied arts (fashion design); at Abdulmari Asia Imao, visual arts (sculpture).

Si Poe ay kinilala sa kanyang husay at nagawa sa industriya ng pelikula at larangan ng sining hindi lamang sa Pilipinas kundi sa buong mundo.

Una nang inanunsiyo noong Abril 11 na gagawing national artist si Poe subalit binawi ng Palasyo dahil hindi pa kumpleto ang proseso ng pagpili. (Ellen Fernando)